暫停美白

由於孕婦不可以亂用美白產品，因部份產品含有可導致畸胎的成份，例如維他命A酸，而對苯二酚也會對胎兒構成不良影響。

應該即係成日聽既美白產品含有水銀~
雖然我唔知Clinique有冇..但為安全起見, 所以呢..我就有理由又去shopping喇..
只係買左4樣野....埋單$1250..洗錢真係快~

安慰既係送番以下呢4樣, 再加一支唇彩, 不過比左奶奶用喇~

美白系列...我地要暫別喇...遲d先搵你地幫手啦~

第一次買尿片

BB, 媽咪第一次幫你買尿片呀!!
感覺好得意, 我長大喇..要做媽媽喇..haha..

好抵呀..原價$56, 藥房買$42.....而家特價$29.9...
買左4包...諗諗下..唔知買唔買多d好呢?

肚紋膏 part 2

早前卡路因為唔岩用呢隻肚紋膏..所以好大方咁比左我用..我試過又冇敏感喎..
hehe..又可以慳番$15x喇~ 多謝晒卡路~

呢罌羊脂膏係人地送比奶奶既澳洲手信, 佢比左一罌我..
聽講羊脂膏幾潤..乾燥時搽肚應該都幾好..

既然個個都對我咁好, 比d好野我搽, 我都唔可以辜負你地架,
我會好勤力架喇..希望冇紋啦!!

陪產

入到產房我會係點呢.....?
等子宮開既時候咩感覺呢.....?
會陣痛幾耐先生得呢.....?
我仲記唔記得點呼吸呢.....?
痛既程度我頂唔頂到呢.....?
BB一出世個樣係點架呢.....?
如果可以揀, 我想同老公一齊面對呢個畢生難忘既一刻~

只要係30週前填左張陪產form, 等醫院寄番封批准信比我, 咁Marco就可以同我一齊見証住BB出世既情景喇~

原來仲有攝影/攝錄申請架..咁BB一出世, 我地就可以影張全家幅喇~

好期待呢日既來臨呀~

孕婦奶粉

懷孕初期, 冇晒胃口, 食極都唔重, 真係有d擔心架~

有日惠氏打電話黎, 話可以用優惠價$65.5買一罐孕婦奶粉(萬寧賣$80幾蚊架), 再送一隻Mozart既音樂CD, 仲包埋送貨添!! 咁我見唔係好貴, 又送到黎門口, 就買黎試下喇! 鐘意飲奶既我, 當然覺得好好飲啦~

但買左番黎先知, 原來一罐只可以沖到7杯, 佢仲建議1日飲2杯添...咪即係4日唔洗就玩完~ 咁我當然唔會1日飲2杯咁多啦..因為聽人講孕婦奶粉好易肥架~ 同埋我都好慳, 佢建議每杯用3殼奶粉, 我就用1殼, 因為佢個奶粉殼超大架, 係平時果d既3倍, 咁我見用1殼奶粉都夠味, 加上我又用黎食粟米片, 都已經有味,,咁就慳住飲喇~

唔知係咪因為飲左孕婦奶粉, 真係重左喎...
不過飲完之後就1磅都冇重過喇....................

結構性超聲波檢查

檢查日期 : 2009年8月20日
體重: 138 LBS 
有左BB: 20W3D
預產期: 2010年1月4日
BB身長: 頭4.75CM, 大脾3.31CM, 腰圍16.78CM, 重量399G

「結構性超聲波檢查」要係大約20週做既, 可以照到BB的手指, 腳趾是否齊全, 有冇兔唇, 仲會睇埋腦，心房，肝，肺，腎，血管，脊椎係咪正常, 同埋可以睇到性別~

醫生講解BB既身體結構, 我地好尊心咁聽, 但唔代表我地會明....
大腦中間係咪間開, 心臟分開4 part, 咩心房, 心室, 血液由右心房流向動脈, 個胃飲左少少胎水, 所以係黑色, 個腎size正常, 胎水正常, 有膀光, 胎盤位置正常, 手指腳指齊晒, bb冇兔唇, 有2隻眼珠, 有鼻骨, 生殖器官, 再聽下血液流動既脈搏聲.......等等! (以上啡色字既野, 我只係明d唔明d..) 醫生一開始就用2D照, 之後仲好好咁轉左4D我睇, 更加清楚!~仲confirm左BB係男仔~

一份 7 張紙既 Report (28張相), 再加4張4D相, 一隻DVD, 呢次檢查只係$800 ($700 + $100DVD),  隻DVD有10mins長既, 拍低左BB個樣,係肚內既郁動, 游水, 轉身, 食手指, 好得意呀, 又可以比屋企人睇下..好有紀念價值!!

呢隻係手掌~

呢隻係腳板~

呢個係尾龍骨~

呢個係BB全身既側面~

登登~~~~我個仔個樣呀~hahaha..

雙手放係胸前..

睇下佢...雙手拎住隻腳呀!! wakaka..

呢張唔係好清楚~

呢張擘大左個口~

DVD果段唔識整上黎, 第時識整再post啦~

小插曲..
就係照BB有冇兔唇時, 有幾個鏡頭係見到佢有兔唇架, Marco都見到, 個醫生都猶豫左一陣, check左幾次, 我心裡十萬個擔心, 不停諗BB係咪有兔唇, 咁仲要唔要好, 到出左世點算, 一大堆問題湧出黎, 雖然醫生最後都話正常, 但我好驚醫生睇錯, 照完之後全日都唔開心, 但係低落既心情只放係心入面冇同人講, 到左夜晚一個人坐係房, 諗諗下終於忍唔住喊左出黎, 仲收唔到聲, Marco都嚇到傻左, 佢安慰完我之後, 心情的確放鬆左好多, 亦都慢慢相信醫生所講既結果, 幾日後心情都逐漸平復番..
原來BB有事, 我真係會咁擔心架 !!

身體變化 : 差唔多每個鐘BB都踢我, 個肚已經超越左個胸喇, 同埋胸部皮膚深色左呀, 分秘物都多左!!

仔仔, 我地最後一關都過左, 我地要繼續努力呀!!

胎動

唔經唔覺已經19W2D, BB同個肚一日一日咁長大, 作嘔既感覺比之前明顯少左, 夜尿就仍然有~

呢排最期待既就係胎動! 因為睇書話感覺到第一次胎動係18週開始, 呢排臨訓都會摸下個肚, 睇下BB有冇踢我, 但係只係感覺到好輕微既郁動, 有時都唔知係BB郁, 定係腸郁~

但直至琴晚, 我臨訓前又放隻手係肚上面, 爸爸就向住個肚同BB講早抖喇, BB就好似回應爸爸咁...突然踢左一下好大力既..我隻手同個肚一齊感覺到, 我諗應該冇錯架喇..呢下就係好實在既胎動喇!!

我當然立即叫埋爸爸一齊放隻手係肚上面啦..過左幾秒..BB又踢..我同爸爸一齊大叫 .."哎呀!! 又有喇" ....果一刻既心情, 又開心, 又想喊, 又興奮, 又感動...呢種感覺好特別, 真係難以形容!! BB連續踢左8下咁多呀!! 我地都開心到暈呀~~~

BB, 你踢我既感覺好實在, 我好鐘意呀~

私家...第四次產檢

檢查日期 : 2009年8月10日
體重: 135.5 LBS (超重 !! )
有左BB: 19W
預產期: 2010年1月4日 (不過張相既日期係09年12月31日喎~)
BB身長: 頭4.8CM(大左9日), 大脾3.2CM(大左3日), 身長13.9CM(大左1日)

一去到磅重, 見自己重左就以為自己好醒, 終於重番幾磅喇..
點知,,,一見醫生就即刻比佢話超重!! 仲叫我控制下..

到做超聲波..見到BB又大個左,,身體各部份都好明顯見到~
我問佢睇唔睇到係仔定女...佢話BB而家夾埋左隻腳,,睇唔到喎..
唔知BB係咪識聽呢,,即刻打開隻腳..醫生就話佢兩腳中間有舊野係度,
有8, 9成係男仔, 不過都係照完結構先confirm !!
之後個醫生就同BB度下頭圍, 身長, 腳長喇~

照完落番床, 醫生就同我講解BB既身體狀況, 佢話而家BB個頭係過大, 大左成week有多, 可能係我食得多, 所以令佢都吸收得多..另外身同腳都有over, 但唔算過份, 佢仲叫我買個磅番屋企, 睇住唔好比自己重咁多, 如果唔係會好難生, 太肥對我身體都唔好!!

BB好似坐係張櫈度咁, 再由下影上去既..(我都知好難明, 偏偏d相就係咁既角度~)

身體變化 : 冇乜想嘔, 個肚都郁多左!!

大頭BB, 我地要減肥喇, 希望我地都健健康康啦~

一家三口行BB展

今日我, Katie, Puff..3 pair人去行bb展
我係第一次去, 感覺好熱鬧, 好多大肚婆, 好多推BB車既一家大細..
由於我地11點到左, 所以唔算多人, 仲拎左好多贈品..

好多環保袋, 扇都有6把, 2本書~

仲有尿片, 奶粉, 口水肩, 紗巾, BB音樂CD, 肚紋膏, 濕疹膏, 濕紙巾.........

呢樣就係我唯一買左既野~ 餵人奶既圍巾$50, 隨時可以餵人奶 ~

一輪3個幾鐘既大戰完畢...
又支力又餓, 去左M記食完野即刻搭車番屋企, 仲訓左3個鐘添!!

原來...今日仲係我同Marco既6週年紀念..我又唔記得左..
不過係呢個紀念日行BB展, 都係一個好sweet既節目~ (死撐中~~)

今年的下水禮 18weeks

細膽者勿看!!

隨住夏天越黎越熱, 當然要做番d涼透心既運動啦, 就係帶埋BB去游水~

游水對孕婦黎講, 係一個好好既運動..同埋可以襯呢個機會著下 Bikini...wakakaka..

唔知我游水果陣,,BB係咪都一齊游緊呢 ?!

*

 

*

 

*

 

*

 

*

 

 

18w3d
只係游左1個鐘..隻手痛到不得了..夜晚訓都訓唔著
都唔知第時點抱B !!

18w5d
為左對手可以休息下, 買左浮板去游, 真係舒服好多~