畢生難忘的生仔經歷

12月23日
生仔之前一晚, 遇著朋友結婚要去飲, 仲攪到差唔多零晨2點先上床訓覺, marco第朝仲要番工, 一定超眼訓!

12月24日
3:15am 去完toilet上床打側訓, 發現2腳中間好似夾住舊野咁..以為bb個頭仔又落左d..仲搵個cushion 放係2個膝頭中間訓, 當時仲叫仔仔唔好咁快出世添..

3:30am 仲未訓著, 覺得有輕微攪肚痛..再去toilet..原來肚痾...

4:00am  又攪肚痛..再去toilet痾左一次..帶少少m痛feel ! 痾完番上床, 一訓落床果下, feel到2下流左少少暖水出黎 (好sure唔係自己賴尿)!! 自己懷疑穿水, 但又唔敢叫醒老公, 因為知佢好眼訓, 如果食炸糊, 聽日仲要番工添!!

4:50am 呢一次m痛比較強烈少少, 係久違了既m痛感覺!! 好明顯係子宮既痛! 覺得應該係架喇..叫醒左老公! 又再次流左d暖水出黎..

5:00am 再double check 一次走佬袋! 想count陣痛, 不過太輕微好難數, 睇得錶黎原來陣痛停左都唔知, 不過都有10 mins 1次,,持續20秒!

6:30am 同老爺奶奶講我地而家入院, 老爺就話等佢車我地~ marco打番公司請假..

**(話說入到產房係不準飲食, 當年姑拉就係20幾個鐘冇水飲, 佢都叮囑我記得飲多d水!  而未食早餐既我, 諗住入到病房先叫marco買早餐比我食! 同埋自己都plan左入產房前會隊一支水先入去既! ) **

7:15am 到左醫院, marco去攪入院登記 (買左支水, 飲左一啖)

7:30am 檢查後, confirm穿水, 所有野放入locker, 即刻入產房 (恍然大悟既我發現..原來我仲未食早餐, 水都只係飲左一啖咋......唔知要空肚捱到幾時!? )

9:45am 由於穿左水6 hrs 仍然1度都未開, 所以落催生藥! 輕微陣痛

12:00pm 仍然1度都未開, 加強到最強藥力既催生藥..(因為隔離床3個同我同時間落藥, 個個都已經3,4度..係我冇反應!) 陣痛可以接受

1:00pm 姑娘突然遞個電話比我, 叫我打比老公! 天真既我以為開到7度, 可以打比老公叫佢黎.. 點知姑娘話 "係叫你老公番屋企呀, 你咁既情況, 起碼要10幾個鐘啦" shit..晴天霹靂, 當時灰爆!!!!

3:00pm  陣痛加劇4 mins 1次,,持續35秒, 但係1度都未開, 陣痛與陣痛之間仲訓得著..有發夢, 仲有鼻鼾, 仲要比自己d鼻鼾嘈醒 (平時訓覺冇架..)

4:30pm 陣痛不能接受, 打左1支止痛針, 開始聞笑氣, 聞左笑氣仲好訓, 個人迷迷糊糊, 覺得天旋地轉, 不過一痛又會痛番醒!

5:00pm 劇痛...想痾屎! 開得3度, 姑娘話仲有排呀! 發現原來我係一個幾怕痛既人...

5:30pm 個人已經不停咆哮..極想痾屎, 姑娘叫我忍住唔好用力痾, 會夾親bb架, 但忍唔到, 會不其然用力痾!! 姑娘冇幫我check, 只係話 "你未有耐呀!"  ...心諗未夠10度已經咁痛, 自己仲妄想如果可以簽紙開刀, 我會即簽!!!! haha..

6:10 pm 不斷急屎既我問姑娘, 點忍呀, 真係好急呀, 之後仲比姑娘話, 你係成年人黎架, 咁都唔識忍!! (之後同d生過既媽媽傾過..果下急屎, 原來冇人忍到架!!) 急屎既感覺已經摭蓋左陣痛既痛楚,,只係極想痾屎!! 經姑娘一check, 已經開到8度, 要即入產房, 果刻仲好清醒, 叫姑娘比電話我打比老公, 電話駁通果下, 就係我陣痛既時候, 我用死去活來 & 微弱既聲線叫老公 "即刻過黎呀......" 講多一句都冇力, 咁就收左線 !

6:15pm 姑娘已經幫我放晒尿, 推入產房..

6:20pm 入到產房我問姑娘可唔可以等埋老公, 姑娘話 "你而家生得喇喎, 點等呀? 你自己忍唔忍到呀?" 不過自己又諗, 如果我仲唔生, 到時BB延遲左先出世, 可能會對佢唔好, 同埋又會夾親佢, 都係生左先啦, 個仔緊要D呀!!

有人話已經見到頭仔! 姑娘叫我將隻腳擺上個架度, 腳都冇晒力, 要好努力先擺到上去!! 當時思緒好混亂, 知道有人同我講野, 但理解唔到人地講乜, 之後又聽到個亞嬸話 "你都唔聽人講野既, 叫你唔好用力呀!", 我都唔知發生咩事~ 

之後姑娘叫我用力, 我咪痾囉, 佢話唔岩, 用力要用長d, 唔好咁快就放鬆, 跟住我就谷住道氣耐d, 期間用左3, 4下力, 頭仔出左!! 姑娘就話而家唔好用力住, 跟住感覺到下面好似比介刀介既感覺, 應該係剪緊, 痛楚可以接受, 剪左2下! 姑娘話如果再痛就再用力, 跟住急屎既感覺又黎, 我就用多2下力..出埋個身~

6:25pm 完成~~~~~~~~ 仔仔出左世! 我果時諗, 下..咁快就生左, 用左幾下力咋喎!! 姑娘抱住左亞仔, 仔仔成身濕立立, 灰色, 有少少血, 扒係我個身到..我即刻伸手想摸佢, 不過比亞嬸喝住, 話佢污糟唔摸得住!! 不過老公就黎唔切, 我要求姑娘比老公入黎產房同我地影全家幅~ 姑娘仲話 "你好叻喎, 生得咁快, 生多幾個都得呀! " 我心諗, 你生丫, 我痛一次都夠晒喇 ! 

亞嬸抱BB比我睇, 叫我鍚佢一啖, 係男仔, 3.09KG, 6:25分出世..一下子要記咁多野! 佢同仔仔沖完涼, 仲問番我佢既資料, 好似考我咁, 我彩我都答岩!!

6:30pm 姑娘幫我搓肚搓番個胎盤出黎, 好痛, 感覺到有pat野流左出黎!! 之後聯針, 打左麻醉針, 唔痛既, 只係感覺到d拉線既感覺!! 我當時都清醒番, 仲問番姑娘頭先幫我剪開定係用介刀介開架, 原來係剪既!!

6:50pm 老公黎到, 亞嬸抱BB比老公睇, 仲叫佢鍚BB! 跟住就係我第一次抱仔仔喇, 果一刻仲有d唔相信呢個就係我地個仔喇~ 於是我地就影左幾張全家幅..老公就出番去喇, 而我就上番產後房~