OSCAR TEST

檢查日期 : 2009年6月25日
體重: 128 LBS (又輕左2磅)
有左BB: 12W3D
預產期: 2010年1月4日
BB身長: 6.17CM (又長左一倍有多喇~)

去威爾斯親王醫院做OSCAR Test, 即「一站式唐氏綜合症篩查」, 利用抽血檢驗及超聲波量度，頸皮厚度，估算胎兒患上唐氏綜合症的機會率，對胎兒完全沒有危險。$1300一次, 個test要係10-13週之間照架~
只需要係網上登記左資料https://www.fetalmedicine.hk/common/oscarbooking.asp, 就會有人打比你約時間, 好方便架 !!

我同Marco 3:15pm去到, 登記完等左一陣, 入左間房抽血, 度高, 磅重, 之後出番大堂等叫名! 我已經叮囑左Marco, 如果我唔記得問BB既性別, 你記住幫我問呀!! 我知道醫生唔會好肯定咁話比你知佢既性別, 只會話 "我估BB係...", "BB應該係...", "BB可能係...", 雖然唔肯定, 但我都想知道, 可以有個心理準備先!! 終於叫我喇, 今次入去就係幫BB度頸皮, 我開始擔心, 會唔會因為肚既脂肪太厚而照唔到呢?  訓上張床後, 護士叫埋Marco入黎睇~

開始搽gel 照超聲波, 醫生仲話, 唔知BB乖唔乖呢, 5秒後...見到BB喇~ d手手腳腳明顯比之前長左, 仲蜈蚣彈左幾下添..跟住就聽佢既心跳, 好大聲, 好快!! 醫生就放大BB既頸位度頸皮喇, 度完之後, 醫生就開始講解BB既結構, 我同Marco都好專心, 醫生話, 呢個係鼻, 呢隻係手, 1, 2, 3, 4, 5 佢有5隻手指, 呢隻係腳, 都數到有5隻腳指, 寧靜中醫生突然講左一句 "男仔黎架" WOW!!! 聽到呢句, 好興奮, 好開心, 放下心頭大石一樣!! 仲即刻由心笑左出黎~ 的確係營光幕中, BB雙腿中間, 明顯有條野係度, Marco都話見到架!! 定一定神後, 咦!!..佢..講..得..咁..肯..定..既..? 點都好啦, 真正答案會係下次照結構時知道!

成個過程完結, 可以落番床, 就到拎紀念品既時候, 就係BB超聲波相, 醫生比左2張相我, 一睇....咦!!咩黎架? 乜都睇唔到..經過一輪解釋先明白~ 之後再出去等報告~

呢一張係大頭特寫既側面~

呢張係佢隻腳板~

報告結果:
BB患上唐氏綜合症的機會率係 1:16839, 屬於低風險!
BB長度係 6.17cm(比平均高度高少少), 頸皮1.7mm(正常), 心跳 164bpm(正常)

身體變化 : 個肚比之前實左, 肚臍對下有條深色既線..

BB, 我地又過一關喇, 你要繼續加油呀 !!